Pse është Shqipëria e varfër? Pse është populli shqiptar i prapambetur sot? Pse është kultura dhe identiteti shqiptar i përçmuar? Pse janë shqiptarët të shpërndarë e të përçarë? Pse nuk jemi ne në të njëjtën rrugë zhvillimi si bota e qytetëruar? Pse nuk jemi ne në gjendje të shfrytëzojmë pasuritë e vendit tonë dhe të gjithë potencialin ekonomik e njerëzor për të t'u bërë shtet i zhvilluar? Pse nuk jemi ne në gjendje të zhvillohemi ekonomikisht dhe kulturalisht? Pse?
Kush na e ka fajin? Kujt duhet t'ia drejtojmë gishtin? Kujt t'i kërkojmë llogari? Vetes tonë? Kulturës sonë? Fesë? Fatit? Historisë? Fqinjëve tanë? Europës? Perandorisë osmane? Komunizmit? Terrenit gjeografik? Zotit? Kujt?
Këto janë pyetje ekzistenciale që trazojnë mendjen dhe shpirtin e çdo shqiptari intelektual, çdo njeriu që shqetësohet për mirëqenien e vendit, familjes, fëmijëve të tij, çdo individi që kërkon një të ardhme më të mirë në vendlindjen e tij.
Me anë të këtij blogu kam si qëllim zbërthimin e ngjarjeve historike dhe koncepteve të gabuara që kanë rrjedhur prej tyre në raport me identitetin etnik e kulturor shqiptar, të cilat edhe pse janë debatuar e stërdebatuar pafundësisht, kanë mbetur ende pa përgjigje shteruese.
Duke i parë këto ngjarje nga një këndvështrim më i gjerë gjeopolitik sesa thjeshtë Shqipëria, fqinjët dhe historia e tyre, e duke aplikuar parimet dhe kuptimet moderne të demokracisë dhe të drejtave të njeriut, do të vini re se shumë koncepte të marra rëndom si të mirëqena deri dje, do të analizohen, vlerësohen, gjykohen e pastaj do të zbërthehen, duke i lënë kështu hapësirë vështrimit të ngjarjeve historike nga një perspektivë krejt e re, e cili na lë të kuptojmë situatat dhe aktorët politikë për atë çka kanë qenë dhe ç’kanë përfaqësuar në të vërtetë në kontekstin global e rajonal historik.
Mendoj se nëpërmjet arsyetimeve në këtë blog, shumë nga pikëpyetjet e mësipërmet do të marrin përgjigje përfundimtare, ndërsa për të tjerat shpresoj që të nxis lexuesin të vazhdojë kërkimin e mëtejshëm deri në zbardhjen e plotë të tyre.
Boshti kryesor i këtij blogu është shtjellimi i konceptit të "Epokës së Errët Shqiptare". Të gjitha shkrimet që trajtojnë këtë temë dhe që janë të lidhura me njëra tjetrën kanë etiketën "epoka e errët". Shkrimi me të njëjtin titull, që gjendet në krye të blogut, bën një përmbledhje të të gjithë ngjarjeve kryesore historike që i unë i kam përkufizuar me këtë emërtim. Megjithatë, për të plotësuar më mirë panoramën e zhvillimeve historike, kam bërë edhe disa shkrime të tjera plotësuese që hedhin dritë mbi zhvillimet para dhe pas epokës së errët. Këto nuk kanë etiketën "epoka e errët" por trajtojnë tema për historinë e shqiptarëve para dhe pas ngjarjeve të epokës së errët.
Shënim: Shkrimet në këtë blog nuk janë punime historike. Ato janë thjeshtë arsyetime (ese). Unë nuk kam zbuluar fakte të reja historike, por i kam mbështetur arsyetimet dhe konkluzionet e mia në bazë të dijeve dhe fakteve që kanë parashtruar historianët e studiuesit nëpërmjet zbërthimit të dokumentacionit historik. Një mirënjohje shkon për të gjithë ata historianë e studiues që me punën e tyre profesionale kanë gërmuar, analizuar e botuar dokumentacionin dhe të dhënat historike që kemi sot për shqiptarët.
Comments
Shto një koment